Loading...
Bro.Ezekiel
Chennai
+91 9444447744

Bible Study

சங்கீதப் புத்தகம் வேத பாடம் 19
**உங்கள் சிந்தனைக்கு*
!
**சங்கீதப் புத்தகம்*

வேத பாடம் 19

தியானிக்க வேண்டிய வேதப் பகுதி: சங்கீதம் 10

*சங்கீதம் 9-இல் உள்ள பிரச்சினை, வெளியிலிருந்து எதிரி படையெடுத்து வருவதாகும்.**
**ஆனால், சங்கீதம் 10-இல் உள்ள பிரச்சினை, உள்ளிருந்தே எதிரி சீர்குலைத்து அழிப்பதாகும்.*
இஸ்ரவேலைச் சுற்றிலும் பொல்லாத தேசங்கள் இருந்தன (சங்கீதம் 9:5). அதேவேளையில், தேவனுடன் உடன்படிக்கை செய்துகொண்ட மக்களின் மத்தியிலும் பொல்லாதவர்கள் இருந்தார்கள் (சங்கீதம் 10:4). அவர்கள் தேவனை அறிந்தவர்கள் என்று சொல்லிக்கொண்டார்கள்; ஆனால், அவர்களுடைய வாழ்க்கை, அவர்கள் உண்மையில் தேவனை அறியாதவர்கள் என்பதை நிரூபித்தது.”
— வாரன் வியர்ஸ்பி
இந்தச் சங்கீதத்தில் துன்மார்க்கர்கள் எண்ணுகின்ற நான்கு கருத்துகளையும், அவற்றுக்கு தேவன் அளிக்கின்ற பதில்களையும் பற்றி விரிவாகப் பார்க்கலாம்.
இந்தச் சங்கீதத்தில் தாவீது குறிப்பிடுகின்ற துன்மார்க்கர்கள் யார்? அவர்கள் இஸ்ரவேலுக்கு வெளியிலிருந்து வருகின்ற புறஜாதியினர் அல்ல; மாறாக, யூத மக்களுக்குள்ளே காணப்பட்ட துன்மார்க்கர்கள்.
இந்தச் சங்கீதத்தை இன்றைய சபைகளில் காணப்படுகின்ற போலிக் கிறிஸ்தவர்களுக்கும் ஓர் எச்சரிக்கையாக எடுத்துக்கொள்ளலாம்.
அப்படிப்பட்டவர்களின் சிந்தனைகளைக் குறித்து இப்பொழுது தியானிக்கலாம்.
துன்மார்க்கர்களின் நான்கு சிந்தனைகள்
1.
**நான் விசாரணைக்கு அப்பாற்பட்டவன்; என்னை யாரும் விசாரிக்க முடியாது.* (சங்கீதம் 10:4, 13)
2. **தேவன் இல்லை.* (சங்கீதம் 10:2–4)
3. **தேவன் என்னைக் கவனிக்க மாட்டார்.* (சங்கீதம் 10:11)
4.* *நான் ஒருபோதும் அசைக்கப்படுவதில்லை.** (சங்கீதம் 10:6)
இந்தக் கருத்துகள் உண்மைக்கு மாறானவை என்று நாம் மறுக்க முடியுமா? அநேக நேரங்களில் ஏழைகள் துன்பப்படுவதையும், அவமானப்படுவதையும், சித்திரவதை செய்யப்படுவதையும் இந்த உலகத்தில் பார்த்திருக்கிறோம். சிறுமைப்படுத்தப்பட்டவர்கள், எளியவர்கள், திக்கற்றவர்கள் ஆகியோர் கவனிக்கப்படாமல் புறக்கணிக்கப்படுவதையும் பார்த்திருக்கிறோம்.
அதேவேளையில், துன்மார்க்கர்கள் செழிப்பாக இருப்பதையும், பெருகி வளர்வதையும் காண்கிறோம்.
இத்தகைய புலம்பல் தாவீதுக்கு மட்டுமே உரியதல்ல. யோபுவும் எரேமியா தீர்க்கதரிசியும் இதேபோன்ற கேள்விகளையும் வேதனைகளையும் வெளிப்படுத்தியிருக்கிறார்கள்.
ஆனாலும், தேவன் எல்லாவற்றையும் கவனித்துக்கொண்டிருக்கிறார் என்பதை இந்தச் சங்கீதம் நமக்கு உணர்த்துகிறது.
தேவன் அளிக்கும் நான்கு பதில்கள்
1. **தேவன் எல்லாவற்றையும் பார்த்துக்கொண்டிருக்கிறார்.* (சங்கீதம் 10:14)
2
**அவர் துன்மார்க்கத்தின் செயல்களை விசாரித்து, அதற்கேற்ற நீதியைச் செய்கிறார்.*(சங்கீதம் 10:15)
3. **சூழ்நிலைகள் எப்படி இருந்தாலும், உலக அரசாங்கங்கள் எவ்வாறு காணப்பட்டாலும், தேவனே உண்மையான அரசராக இருக்கிறார்.* (சங்கீதம் 10:12–13, 16)
4. **இன்றைக்கும் அவர் சிறுமைப்படுத்தப்பட்டவர்களையும் எளியவர்களையும் பாதுகாக்கின்ற தேவனாக இருக்கிறார். **(சங்கீதம் 10:17–18)
**ஒன்பதாவது சங்கீதத்தில், “கர்த்தாவே, எழுந்தருளும்” என்று தாவீது தேவனை நோக்கி வேண்டுகிறான்.**
அநீதி இழைக்கின்ற எதிரிகளுக்கு எதிராகவும், அநீதியைச் செய்கின்றவர்களின் ஆட்சிக்கு எதிராகவும் தேவன் செயல்பட வேண்டும் என்பதே அவனுடைய வேண்டுதலாக இருக்கிறது.
**அதேபோன்று, இந்தச் சங்கீதத்திலும் அநீதி இழைக்கின்ற துன்மார்க்கர்களை தேவன் தண்டித்து, ஒடுக்கப்பட்டவர்களுக்கு நீதி செய்ய வேண்டும் என்று தாவீது வேண்டுகிறான்.*
இந்தச் சங்கீதத்தில் ஆறுதலளிக்கின்ற சில வார்த்தைகள் காணப்படுகின்றன:
“திக்கற்றவர்களுக்கு நீரே துணையாய் இருக்கிறீர்.” (சங்கீதம் 10:14)
மேலும், தாவீது இவ்வாறு அறிக்கையிடுகிறான்:
“கர்த்தர் சதாகாலங்களுக்கும் ராஜாவாயிருக்கிறார்; புறஜாதியார் அவருடைய தேசத்திலிருந்து அழிந்துபோவார்கள்.” (சங்கீதம் 10:16)
இறுதியில், இந்தச் சங்கீதக்காரன் நம்பிக்கையோடு தன் சங்கீதத்தை முடிக்கிறான். **திக்கற்றவர்களுக்கும் ஒடுக்கப்பட்டவர்களுக்கும் நீதி செய்கிற தேவன் இருக்கிறார் என்பதே அவனுடைய நம்பிக்கை.**
இந்தச் சங்கீதம் நமக்கு உணர்த்தும் பாடங்கள்
இன்றைக்கும் நமது சபைகளில் ஒடுக்கப்பட்டவர்களுக்கும் சிறுமைப்படுத்தப்பட்டவர்களுக்கும் ஆறுதல் அளிப்பதற்கு நாம் தயாராக இருக்கிறோமா?
அவர்களும் தேவனுடைய சரீரமாகிய சபையின் உறுப்பினர்கள் என்று எண்ணுகிறோமா?
பணம் படைத்தவர்களும் வசதி படைத்தவர்களும் கர்த்தருக்கு முன்பாக இருப்பதைப்போலவே, ஏழைகளும் எளியவர்களும் அவருக்கு முன்பாகச் சமமானவர்கள் என்பதை உணர்ந்துகொள்கிறோமா? அல்லது அவர்களைப் பிரித்து வைக்கிறோமா?
**கிறிஸ்தவத்தில் காணப்படும் கொடிய பாவங்களில் ஒன்று, தேவன் தமது சரீரமாகிய சபையில் உறுப்பினர்களாக இணைத்தவர்களை, அவர்கள் அந்தச் சரீரத்தின் உறுப்பினர்கள் அல்லாதவர்களைப்போல நடத்துவதாகும். இதைவிடக் கொடிய பாவம் வேறொன்றும் இல்லை.*
*"காது உள்ளவன் கேட்கக்கடவன்!*