யோபுவின் புத்தகம் வேதபாடம் – 18
*உங்கள் சிந்தனைக்கு..*
*யோபுவின் புத்தகம்*
Expository Commentary on the Book of Job
வேதபாடம் – 18
நடுவரைத் தேடிய யோபுவின் அங்கலாய்ப்பு
யோபு, கடவுளுடைய பார்வையில் குற்றமில்லாதவனும், நேர்மையானவனும், தேவனுக்குப் பயந்து தீமையை விட்டு விலகி வாழ்ந்தவனுமாக காணப்பட்டான் (யோபு 1:1). அவன் வாழ்ந்த பகுதியில் இருந்த அனைவரிலும் மிகுந்த மதிப்பும் செல்வாக்கும் பெற்ற மனிதனாகவும், பெரும் செல்வந்தனாகவும் இருந்தான்.
தன்னுடைய பிள்ளைகள் ஒருவேளை தங்கள் இருதயங்களில் பாவம் செய்து தேவனைத் தூஷித்திருக்கலாம் என்று நினைத்து, அவர்களை அழைத்து பரிசுத்தப்படுத்துவான். அதிகாலையில் ஒவ்வொருவருக்காகவும் தகனபலிகளைச் செலுத்துவான் (யோபு 1:5). இப்படிப்பட்ட தேவபக்தியுள்ள மனிதன், ஒரே நாளில் தனது செல்வங்களையும், தன் பிள்ளைகள் அனைவரையும் இழந்தான்.
அதற்குப் பிறகு, தேவனுடைய அனுமதியோடு சாத்தான், யோபுவின் உள்ளங்காலிலிருந்து உச்சந்தலைவரை வேதனைமிக்க கொப்புளங்களால் அவனை வாதித்தான் (யோபு 2:7).
இவ்வளவு துன்பங்களைச் சகித்த யோபுவுக்கு ஒரு காரியம் மட்டும் புரியவில்லை. " *இது ஏன் எனக்கு நடந்தது?" என்ற கேள்விக்குப் பதில் அவனுக்குக் கிடைக்கவில்லை* . தான் எந்தக் குற்றமும் செய்யவில்லை என்பதில் அவன் உறுதியாக இருந்தான். எந்தச் சூழ்நிலையிலும் அவன் தேவனை மறுதலிக்கவில்லை.
"என் கைகளில் கொடுமை இல்லை; என் ஜெபமும் சுத்தமானதே" (யோபு 16:17) என்று கூறுகிறான். இருந்தும் தனக்கு ஏன் இந்த வேதனை வந்தது என்பதை அவனால் விளங்கிக்கொள்ள முடியவில்லை.
இந்த நிலையில்தான் யோபுவின் உள்ளத்தில் பல ஆழ்ந்த விருப்பங்கள் எழுந்தன.
தேவனை நேரில் சந்திக்க வேண்டும் (யோபு 23:3).
தேவனோடு நேரடியாகப் பேச வேண்டும் (யோபு 13:3).
இவை சாத்தியமற்றவை என்பதை யோபு அறிந்திருந்தான். **ஆனால் அவன் இருதயத்தின் ஆழத்தில் இன்னும் ஒரு ஏக்கம்* எரிந்துகொண்டே இருந்தது.
"எனக்கும் தேவனுக்கும் நடுவில் ஒரு நடுவர் வேண்டும்!" (யோபு 9:33; 16* :19–21).
"நான் ஏன் இந்தத் துன்பத்தை அனுபவிக்கிறேன் என்பதை தேவனிடமே கேட்க வேண்டும். ஆனால் *என்னையும் தேவனையும் இணைக்கும் ஒரு நடுவர் இல்லை!"*
*இதுவே யோபுவின் இதயத்தின் ஆழ்ந்த அங்கலாய்ப்பு* .
*பழைய ஏற்பாட்டில், தேவனுக்கும் மனிதனுக்கும் நடுவில் இப்படிப்பட்ட ஒரு* *நடுவருக்கான ஏக்கத்தை யோபுவைப் போல* *இவ்வளவு தெளிவாக வெளிப்படுத்திய வேறு ஒருவரைக் காண்பது அரிது* .
பழைய ஏற்பாட்டில் பரிசுத்தவான்களின் பாவங்கள் கிறிஸ்துவின் வரவிருக்கும் பலியை முன்னோக்கி மன்னிக்கப்பட்டன. ஆனால் புதிய ஏற்பாட்டில், அந்த வாக்குறுதி நிறைவேறியுள்ளது.
நம்முடைய ஆண்டவராகிய இயேசு கிறிஸ்து நம்முடைய பாவங்களைப் போக்கும்படியாக சிலுவையில் தம்மையே பலியாக ஒப்புக்கொடுத்தார். ஆனால் அவருடைய ஊழியம் சிலுவையோடு முடிந்துவிடவில்லை.
அவர் இன்றும் பிதாவின் வலதுபாரிசத்தில் நமக்காகப் பரிந்துபேசுகிற நடுவராக இருக்கிறார். இது புதிய ஏற்பாட்டு விசுவாசிகளுக்குக் கொடுக்கப்பட்ட விலைமதிப்பில்லாத தேவனுடைய ஈவாகும்.
நாம் கிறிஸ்துவை விசுவாசித்தபோது நம்முடைய பாவங்கள் மன்னிக்கப்பட்டன. ஆனால் அதன்பிறகும் நாம் பலவீனங்களில் தவறுகிறோம். அப்படிப்பட்ட சமயங்களிலும் நாம் தேவனோடு ஐக்கியத்தில் நிலைத்திருப்பதற்குக் காரணம், நமக்காக இயேசு கிறிஸ்து தொடர்ந்து பரிந்துபேசுகிற அந்த உன்னத ஆசாரிய ஊழியமே ஆகும்.
*யோபுவின் காலத்தில் அடைய முடியாத இந்த ஆசீர்வாதம், இன்று புதிய ஏற்பாட்டு* *விசுவாசிகளுக்கு இலவசமாகக் கொடுக்கப்பட்டுள்ளது* .
இதுவும், பழைய ஏற்பாட்டு பரிசுத்தவான்களைவிட புதிய ஏற்பாட்டு விசுவாசிகள் அதிகமான சலுகைகளையும் ஆசீர்வாதங்களையும் பெற்றிருக்கிறார்கள் என்பதற்கான ஒரு முக்கிய காரணமாகும்.
யோபுவின் அங்கலாய்ப்பு எவ்வளவு உண்மையானது என்பதை அவன் தன் நண்பர்களைப் பற்றிக் கூறிய வார்த்தைகளிலிருந்து அறிந்துகொள்ளலாம். ஆறுதல் சொல்ல வந்த அவர்கள், அவனுடைய வேதனையையும் பாரத்தையும் உணரவில்லை. அதனால் அவர்கள் "துன்பப்படுத்தும் தேற்றவாளர்கள்" (யோபு 16:2) என்று அழைக்கப்பட்டார்கள்.
ஆனால் இன்று நமக்கு இருக்கிற நடுவராகிய இயேசு கிறிஸ்து அப்படிப்பட்டவர் அல்ல.
"நம்முடைய பலவீனங்களைக்குறித்து அனுதாபப்பட முடியாத பிரதான ஆசாரியர் நமக்கில்லை; அவர் எல்லாவிதத்திலும் நம்மைப்போலவே சோதிக்கப்பட்டும் பாவமில்லாதவராயிருந்தார்." (எபிரெயர் 4:15)
*ஆகவே, இயேசு கிறிஸ்துவின் ஊழியம் சிலுவையில் முடிந்துவிடவில்லை* . அது இன்றும் தொடர்ந்து கொண்டிருக்கிறது; நாம் இந்த உலக வாழ்க்கையை முடித்து அவருடைய சந்நிதியில் சேரும் நாள் வரை அது தொடரும்.
*யோபுவின் நிறைவேறாத ஏக்கம், இன்று ஒவ்வொரு கிறிஸ்தவ விசுவாசியின் வாழ்க்கையிலும் நிறைவேறிக்* *கொண்டிருக்கிறது* .
*யோபு ஏங்கிய நடுவர், இன்று நமக்குக் கிடைத்திருக்கிறார்.*
யோபு தேடிய அணுகுமுறை, இன்று நமக்குத் திறந்திருக்கிறது.
யோபு எதிர்பார்த்த பரிந்துரை, இன்று நமக்காக இடைவிடாமல் நடைபெற்று வருகிறது.
இந்த மகத்தான கிருபைக்காக தேவனுக்கு என்றும் ஸ்தோத்திரம்.
கடவுளுடைய பணியில்,
எசேக்கியேல் சண்முகவேல்