ஏதேன் தோட்டம் நமக்குக் கற்றுக்கொடுக்கும் மிக முக்கியமான பாடம்!
**உங்கள் சிந்தனைக்கு*
*ஏதேன் தோட்டம் நமக்குக் கற்றுக்கொடுக்கும் மிக முக்கியமான பாடம்!**
**தேவனைத் தரிசித்து நடப்பவர்களைவிட, தேவனுடைய வார்த்தையை விசுவாசித்து அதற்குக் கீழ்ப்படிந்து நடப்பவர்களே மேலானவர்கள்* என்பதுதான் ஏதேன் தோட்டம் நமக்குக் கற்றுக்கொடுக்கும் மிக முக்கியமான பாடங்களில் ஒன்று.
ஆதாமும் ஏவாளும் தேவனுடைய பிரசன்னத்தில் வாழ்ந்தவர்கள். தேவனை அறிந்தவர்கள் மட்டுமல்ல, அவருடைய பிரசன்னத்தை அனுபவித்தவர்கள். ஆனாலும், **அவர்கள் தேவனுடைய வார்த்தையை விசுவாசிக்கத் தவறினார்கள்*.
நன்மை தீமை அறியத்தக்க விருட்சத்தின் கனியைப் புசித்தால் மரணம் உண்டாகும் என்று தேவன் எச்சரித்திருந்தார். **ஆனால் அவர்கள் அந்த வார்த்தையை நம்பவில்லை; விசுவாசிக்கவில்லை*,அதற்குக் கீழ்ப்படியவும் இல்லை.
வேதம் கூறுகிறது:
"அப்பொழுது ஸ்திரீயானவள், அந்த விருட்சம் புசிப்புக்கு நல்லதும், பார்வைக்கு இன்பமும், புத்தியைத் தெளிவிக்கிறதற்கு இச்சிக்கப்படத்தக்க விருட்சமுமாய் இருக்கிறது என்று கண்டு, அதின் கனியைப் பறித்து, புசித்து, தன் புருஷனுக்கும் கொடுத்தாள்; அவனும் புசித்தான்." (ஆதியாகமம் 3:6)
**தேவனுடைய வார்த்தையைவிடத் தங்கள் கண்களுக்குத் தெரிந்த தோற்றத்தையும், பிசாசின் பொய்யான வாக்குறுதியையும் அவர்கள் நம்பினார்கள்*. அதன் விளைவாக தேவனுடைய கட்டளையை மீறினார்கள்.
இன்றைக்கும் இதே நிலைதான் காணப்படுகிறது. "நான் தேவனைத் தரிசித்தேன்; தேவனைப் பார்த்தேன்; அவர் என்னோடு பேசினார்" **என்று சொல்லுகிறவர்கள் எல்லோரும் தேவனுடைய வார்த்தையை எந்த அளவுக்கு விசுவாசிக்கிறார்கள், அதற்கு எந்த அளவுக்குக் கீழ்ப்படிகிறார்கள் என்பது சிந்திக்க வேண்டிய கேள்வியாக இருக்கிறது.*
**தேவனைத் தரிசித்ததாகச் சொல்வது மட்டுமே ஒருவருடைய ஆவிக்குரிய வாழ்க்கைக்கு உத்தரவாதமாகிவிடாது.* **தேவனுடைய வார்த்தையை விசுவாசித்து, அதன்படி வாழ்வதில்தான் உண்மையான ஆவிக்குரிய வாழ்க்கை வெளிப்படுகிறது.*
தேவனுடைய வார்த்தையை விசுவாசித்து, அதற்குக் கீழ்ப்படிகிறவர்கள், **வெறும் தரிசன அனுபவங்களைச் சார்ந்து வாழ்பவர்களைவிட உறுதியான ஆவிக்குரிய வாழ்க்கையைக் கொண்டிருக்கிறார்கள்.*
தேவனைத் தரிசித்ததாகக் கூறுகிறவர்கள் ஏமாற்றப்படலாம்; தவறான வழிநடத்துதலுக்கு உட்படலாம்; கீழ்ப்படியாமலும் போகலாம். ஆனால் தேவனுடைய வார்த்தையை அடிப்படையாகக் கொண்டு, விசுவாசத்துடன் அதற்குக் கீழ்ப்படிந்து வாழ்கிறவர்கள் ஒருபோதும் வெட்கப்பட்டுப்போவதில்லை.
"விசுவாசத்தினாலே நீதிமான் பிழைப்பான்" என்ற சத்தியம் ஆபிரகாமின் காலத்தில்தான் ஆரம்பமானது என்று சிலர் நினைக்கலாம். **ஆனால் விசுவாசத்தின் அவசியத்தை தேவன் ஏதேன் தோட்டத்திலேயே மனிதனுக்குக் கற்றுக்கொடுத்தார். தேவனுடைய வார்த்தையை விசுவாசிப்பதும், அதற்குக் கீழ்ப்படிவதும் மனிதனுடைய வாழ்க்கையில் எவ்வளவு முக்கியமானது என்பதை ஆதாம் ஏவாளின் அனுபவம்* நமக்கு உணர்த்துகிறது.
கிறிஸ்தவ வாழ்க்கை என்பது முழுக்க முழுக்க விசுவாசத்தைச் சார்ந்த வாழ்க்கை. அந்த விசுவாசம் வெறும் மனதளவிலான நம்பிக்கையாக மட்டும் இருந்துவிடக் கூடாது. அது தேவனுடைய வார்த்தைக்குக் கீழ்ப்படிகிற வாழ்க்கையாக வெளிப்பட வேண்டும்.
கீழ்ப்படியாமை எங்கே ஆரம்பிக்கிறது?
**தேவனுடைய வார்த்தைக்கு நாம் கொடுக்க வேண்டிய முக்கியத்துவத்தைக் குறைத்துக்கொள்ளும்போதுதான் கீழ்ப்படியாமை ஆரம்பிக்கிறது*.
*எங்கே தேவனுடைய வார்த்தை மதிக்கப்படவில்லையோ, எங்கே அதற்கு உரிய இடமும் அதிகாரமும் கொடுக்கப்படவில்லையோ, அங்கேதான் கீழ்ப்படியாமைக்கான ஆரம்பம் ஏற்படுகிறது*.
தேவனை நம்முடைய இருதயத்தின் சிங்காசனத்தில் வைத்திருப்பதாகச் சொல்லிக்கொள்வது மட்டுமே கீழ்ப்படிதல் அல்ல. அது வெறும் மனதளவிலான ஓர் ஒப்புதல் அல்லது வெளிப்புறத் தோற்றமாக இருந்துவிடலாம். ஆனால் உண்மையான கீழ்ப்படிதல் என்பது தேவனுடைய வார்த்தைக்குக் கொடுக்கப்படும் முக்கியத்துவத்திலும், அந்த வார்த்தையின்படி நாம் செயல்படுகிற வாழ்க்கையிலும்தான் வெளிப்படுகிறது.
தேவனைத் தரிசிப்பதைவிட அவருடைய வார்த்தையை விசுவாசிப்பது முக்கியம். தேவனுடைய வார்த்தையை விசுவாசிப்பதைவிட மேலானது என்று எதுவுமில்லை; அந்த விசுவாசம் கீழ்ப்படிதலாக வெளிப்பட வேண்டும்.
இதுதான் ஏதேன் தோட்டம் நமக்குக் கற்றுக்கொடுக்கும் மிக முக்கியமான பாடம்!