யோபுவின் புத்தகம் — வேதபாடம் 41
*உங்கள் சிந்தனைக்கு*
*யோபுவின் புத்தகம் — வேதபாடம் 41*
படைப்புகளைப் பராமரிக்கும் தேவன்
யோபு 38:39 முதல் 39:30 வரை உள்ள பகுதிகளில், தேவன் தாம் படைத்த *உயிரினங்களின் மீது எவ்வளவு அக்கறையுள்ளவராக இருக்கிறார்* *என்பதை யோபுவுக்கு உணர்த்துகிறார்.*
*தேவன் வெறுமனே படைத்துவிட்டு, தாம் படைத்தவற்றை கவனிப்பாரற்றுக் கைவிடுகிறவர்* *அல்ல. ஒவ்வொரு படைப்பின் தேவையையும், அதன் வாழ்க்கை முறையையும்* *அறிந்து, தமது ஞானத்தினால் அவற்றைப் பராமரித்து* *வருகிறார்* . *இங்கே God’s providence — தேவனுடைய பராமரிப்பு மிகத்* *தெளிவாக வெளிப்படுகிறது* .
இந்தப் பகுதியில் பல்வேறு மிருகங்களையும் பறவைகளையும் குறித்து தேவன் பேசுகிறார். அவற்றின் தனித்தன்மைகள், அவற்றின் வாழ்க்கை முறைகள், அவற்றுக்குத் தேவையான உணவு மற்றும் பாதுகாப்பு ஆகியவற்றின் மூலம் யோபுவுக்கு ஆழமான ஆன்மிகப் பாடங்களை கற்றுக்கொடுக்கிறார்.
அவற்றில் சிலவற்றைச் சுருக்கமாக தியானிப்போம்.
1. *சிங்கம் — வலிமையும் வேட்டையாடும்* திறனும்
சிங்கம் வலிமைமிக்க ஒரு வேட்டையாடும் விலங்கு. அது காட்டில் பதுங்கியிருந்து சரியான நேரத்தில் தனது இரையைத் தாக்குகிறது. தனது குட்டிகளுக்குத் தேவையான உணவையும் தேடிப் பெற்றுக்கொள்கிறது.
தேவன் உணர்த்தும் பாடம்:
மனிதனால் காட்டில் வாழும் சிங்கத்திற்கும் அதன் குட்டிகளுக்கும் உணவை ஏற்பாடு செய்ய முடியாது. ஆனால் அவற்றின் தேவையை தேவன் அறிந்திருக்கிறார்.
நமக்கான பாடம்:
நம்மால் பார்க்க முடியாத இடங்களிலும், நம்மால் ஏற்பாடு செய்ய முடியாத சூழ்நிலைகளிலும், தேவன் தமது படைப்புகளின் தேவையை அறிந்து பராமரிக்கிறார். அப்படியானால், அவருடைய பிள்ளைகளாகிய நம்முடைய தேவைகளை அவர் அறியாமல் இருப்பாரா?
2. *காட்டாடு — மனிதனுக்குப் புலப்படாத பராமரிப்பு*
காட்டாடுகள் பாறைகள் நிறைந்த கடினமான பகுதிகளில் வாழ்கின்றன. அவை எப்போது குட்டிகளை ஈனுகின்றன என்பதையும், அவற்றின் குட்டிகள் எவ்வாறு காடுகளில் வளர்கின்றன என்பதையும் மனிதனால் முழுமையாகக் கண்காணிக்க முடியாது.
குட்டிகள் வளர்ந்து தங்களுக்கான வாழ்க்கையைத் தொடங்குகின்றன.
தேவன் உணர்த்தும் பாடம்:
மனிதனுடைய கண்காணிப்புக்கு அப்பாற்பட்ட இடங்களிலும் தேவனுடைய பராமரிப்பு செயல்பட்டுக்கொண்டிருக்கிறது.
3. *பெண் மான் — நுட்பமான வாழ்க்கை ஒழுங்கு*
பெண் மானின் வாழ்க்கையில் இனப்பெருக்கம், குட்டிகளைப் பெற்றெடுத்தல், அவற்றை வளர்த்தல் போன்ற இயற்கையான ஒழுங்குகள் உள்ளன. குட்டிகள் வளர்ந்தபின் தங்கள் வாழ்க்கையைத் தனியாகத் தொடர்கின்றன.
தேவன் உணர்த்தும் பாடம்:
*உயிரின் ஆரம்பமும், வளர்ச்சியும், அதன் இயற்கையான ஒழுங்கும் மனிதனுடைய* *முழுமையான கட்டுப்பாட்டில் இல்லை. இவை* *அனைத்திற்குப் பின்னாலும் தேவனுடைய* *ஞானமும் பராமரிப்பும் இருக்கின்றன.*
4. *காட்டுக் கழுதை — சுதந்திரம்*
காட்டுக் கழுதை கடினமான வனாந்தரச் சூழலிலும் வாழக்கூடியது. அது மனிதனுடைய கட்டுப்பாட்டிற்கு எளிதில் உட்படுவதில்லை. குறைந்த வளங்களிலும் தனக்கான உணவைத் தேடிக் கொள்ளும் திறன் அதற்கு உள்ளது.
தேவன் உணர்த்தும் பாடம்:
*மனிதனுக்குப் பயன்பாடற்றதாகத் தோன்றும் ஒரு உயிரினத்திற்குக்கூட* *தேவன் ஒரு இடத்தையும், ஒரு வாழ்க்கை முறையையும் கொடுத்திருக்கிறார்* .
மனிதன் “இதனால் எனக்கு என்ன பயன்?” என்று கேட்கலாம். ஆனால் தேவனுடைய படைப்பில் எந்த உயிரும் அர்த்தமற்றதல்ல.
5. *காட்டு எருது* — அபாரமான வலிமை
காட்டு எருது மிகுந்த வலிமை கொண்டது. ஆனால் அதன் வலிமையை மனிதன் விரும்பியபடி பயன்படுத்த முடியாது. அதை நுகத்தடியில் கட்டி வயலை உழச் செய்யவும் முடியாது.
தேவன் உணர்த்தும் பாடம்:
வலிமை இருக்கிறது என்பதற்காக அது மனிதனுக்குப் பயன்படும் என்ற அவசியமில்லை. ஒவ்வொரு உயிரினத்திற்கும் தேவன் ஒரு தனித்தன்மையையும், ஒரு வாழ்க்கை முறையையும், ஒரு நோக்கத்தையும் கொடுத்திருக்கிறார்.
எனவே, *தேவன் ஒவ்வொரு உயிரினத்தையும் ஒரு நோக்கத்தோடு படைத்திருக்கிறார்* ; *அவற்றின் தேவைகளையும் அறிந்து அவற்றைப் பராமரித்து வருகிறார்* .
யோபுவிடம் தேவன் கேட்கும் இந்தக் கேள்விகளின் மூலம் ஒரு பெரிய உண்மையை நாம் கற்றுக்கொள்கிறோம்:
*படைப்பின் மீது அதிகாரம் செலுத்துகிற தேவன், தாம் படைத்த* *படைப்புகளின் மீது அக்கறையும் கொண்டிருக்கிறார்* .
மனிதனால் பராமரிக்க முடியாத சிங்கத்தையும், காட்டாடையும், காட்டுக் கழுதையையும் தேவன் பராமரிக்கிறார் என்றால், நம்முடைய வாழ்க்கையின் ஒவ்வொரு தேவையையும் அவர் அறிந்திருக்கிறார் என்பதில் நாம் நம்பிக்கை வைக்கலாம்.
பறவைகளைக் குறித்து தேவன் யோபுவிடம் என்ன சொல்கிறார்? அவற்றின் சிறப்புத் தன்மைகள் என்ன? அவற்றின் மூலம் தேவன் நமக்கு உணர்த்தும் ஆன்மிகப் பாடங்கள் என்ன?
அதை அடுத்த பதிவில் பார்க்கலாம்.